Isa 11 | NdeIBE | STEP | Ihlumela lizavela esidindini sikaJese; uGatsha oluhlume ezimpandeni zakhe luzathela izithelo.

Isaiah 11

UGatsha Oluvela kuJese

1 Ihlumela lizavela esidindini sikaJese; uGatsha oluhlume ezimpandeni zakhe luzathela izithelo.

2 UMoya kaJehova uzakuba phezu kwakhe – uMoya wokuhlakanipha lowokuqedisisa, uMoya wokweluleka lowamandla, uMoya wokwazi lowokwesaba uJehova –

3 njalo uzathokoziswa yikwesaba uJehova. Kayikwahlulela ngalokho akubona ngamehlo akhe, loba aqume ngalokho akuzwa ngendlebe zakhe;

4 kodwa abaswelayo uzabehlulela ngokulunga aqumele abayanga basemhlabeni ngokulunga. Uzatshaya umhlaba ngentonga yomlomo wakhe; ngomoya wendebe zakhe uzabulala ababi.

5 Ukulunga kuzakuba libhanti lakhe, ukwethembeka kube luzwezwe ekhalweni lwakhe.

6 Impisi izahlala lezinyane lemvu, ingwe izalala phansi lembuzi, ithole kanye lesilwane kanye lenkonyane elilomnyaka owodwa kudle ndawonye, umntwana omncane akukhokhele.

7 Inkomokazi izakudla lebhere, amankonyane akho alale ndawonye; njalo isilwane sizakudla utshani njengenkabi.

8 Usane luzadlalela phansi komlindi webululu, umntwana omncane angenise isandla sakhe emlonyeni womlindi wenhlangwana.

9 Abayikulimaza loba badilize kuyo yonke intaba yami engcwele ngoba umhlaba uzakuba usugcwele ulwazi lukaJehova njengamanzi egcwele ulwandle.

10 Ngalolosuku iMpande kaJese izakuma njengophawu ebantwini; izizwe zizabuthana kuye, indawo yakhe yokuphumula izakuba lodumo. 11 Ngalolosuku uJehova uzakwelula isandla sakhe okwesibili ukuba abuyise insalela zabantu bakhe abasala e-Asiriya, ePhathrosi, eTiyopiya, eKhushi, e-Elami, eShinari, eHama lasezihlengeni zolwandle.

12 Uzaphakamisela izizwe uphawu aqoqe abaxotshwayo ko-Israyeli. Uzahlanganisa abantu bakoJuda abahlakazekileyo bevela emagumbini amane omhlaba.

13 Ubukhwele buka-Efrayimi buzaphela; izitha zikaJuda zizaqunywa u-Efrayimi akayikukhwelezela uJuda kumbe uJuda abe lobutha ku-Efrayimi.

14 Bazahwitha phansi emithezukweni yaseFilistiya ngasentshonalanga; bebonke bazaphanga abantu basempumalanga. Bazanqoba i-Edomi leMowabi lama-Amoni azakuba ngaphansi kwabo.

15 UJehova uzacitsha umsele wolwandle lwaseGibhithe, ngomoya otshisayo uzadlulisa isandla sakhe phezu komfula uYufrathe. Uzawahlukanisa ube yizifula eziyisikhombisa ukuze abantu bawuchaphe befake amanyathelo.

16 Kuzakuba lomgwaqo omkhulu wezinsalela zabantu bakhe abasele e-Asiriya, njengoba kwakunjalo ko-Israyeli ekubuyeni kwabo bevela eGibhithe.